للعجين:
- نص كيلو فورص ممتاز
- اربع معالق كبار زيت رومية
- شوية خمير الدار
- خميرة الحلوى
- شوية لملحة
- ومعلقة سنيدة
- تلات معالق كبار نيدو
- دانون مسوس
الطريقة:
نجمعو كل شي بماء دافي بحال العجينة العادية نخليوها ترتاح بما وجدنا الحشوة
للحشو:
تنديرو الفلفة حمرا وخضرا وصفرا انا هنا درت غير الخضرا هي اللي كانت عندي
تنقطعوها مربعات صغيرة ونزيدو ليها بصلة مشلظة ونشحرو الكل فمقلاة فشوية زيت العود منين ترخف مزيان نطفيو عليها ونزيدو مليحة وابزار وقزبر وزوج علب طون
ناخدو العجينة نسرحوها على شكل مربع كبير ونديرو الحشوة الوسط
ونديرو فوقها فرماج حمر محكوك ونسدو الجهة الاولى ونديرو فوقها الفرماج محكوك وعاد نسدو الخبزة ديالنا تتولي بحال شكل بينواز ونبداو نقطعوها مستطيلات وندهنوها بالبيض وجنجلان او الحبة السوداء من لفوق ونحطوها فالفرن
وبالصحة والراحة
