السلام عليكم ورحمة الله وبركاته
خواتي في الله اليوم غادي نشارككم بسر من اسراري واللي مانقدرش نستغنى عليه
هيا عبارة عن خلطة من العطرية كانستعملها في كل طبخي وتعطيه مذااق رائع والكل اللي ياكل عندي كايقولي تبارك الله عليك ويموتو باش يعرفو هذ الخلطة (احيانا كانكون انانية ومانعطيهم السر ههههه) واليوم حبيت نشارككم هذ السر
يلا جيبو قلم وورقة كبييييييييييييييرة لان الخلطة فيها بزااف (بعض العطرية كانجيبها من مرجان (كاينة مطحونة وكاينة حبوب)وراه رائعة غير ماتجيبيهاش من عند العطار مطحونة والى بغيتي تشريها عند العطار شمي ريحتها وشوفي لونها الى لونها جديد وفيها ريحة شريها وضروري تنقيها مزياااان وتمسحيها وتطحنيها وبخوصوص الزعترواليازير انا كانشريهم بكميات كبيرة جديد ونغسلو ونسقطرو ونشرو على شي زيف في الظل ونخليه يبس ونشدو ونحيد ليه لعواد ونديرو في شي قرعة ديال الزاج ونسد عليه ونبقى نستعملو لان ديال العطار كايكون مسخ وقديم وحتى الى جبتيه عند العطار غسليه تحت الروبيني ماتخليهش ينقع ديريه في شي زويف وخوي عليه الماء وحطيه ينشف عاد تستعمليه
انا كاندير كمياة كبيرة وانتما ديرو كمية صغيرة الى حبيتو
المهم انا غادي نعطيكم قياس كمية صغيرة ان شاءالله
بسم الله
نصف كاس كبير >> الفلفل الاحمر الحار يابس ومطحون (يبسيه في الدار ولا جيبيه عند العطار يابس وطحنيه في الدار)
ربع كاس قرفة بلدية مطحونة (مطحونة في الدار)
ربع كاس قرفة رومية مطحونة (القرفة الهندية)(مطحونة في الدار)
نصف كاس كبير سكنجبير مطحون (مطحون من مرجان)
كاس ونصف خرقوم مطحون (مطحون من مرجان)
نصف كاس كبير بزار ابيض مطحون (مطحون من مرجان)
نصف كاس كبير بزار اسود مطحون (مطحون في الدار)
نصف كاس زعتر جديد ميبس مطحون (مطحون في الدار)
كاس يازير مطحون (مطحون في الدار)
كاس زريعة القزبور مطحونة (مطحون في الدار)
4ديال الكوزات كبار مسخنين في المقلة ومطحونين( مطحون في الدار)
1معلقة كبيرة كوزة بلدية (الصحراوية)مطحونة(مطحون في الدار)
ربع كاس نعناع يابس مطحون ( مطحون في الدار)
1كاس معدنوس يابس ومطحون ( مطحون في الدار)
نصف كاس حلبة مطحونة ( مطحون في الدار)
2معالق كبار حبق يابس ومطحون ( مطحون في الدار)
نصف كاس هيل (قعقلة) مطحون( مطحون في الدار)
نصف كاس نويويرة مطحونة( مطحون في الدار)
نصف كاس بسيبيسة مطحونة( مطحون في الدار)
1معلقة كبيرة قرنفل مطحون (جديد) ( مطحون في الدار)
2معالق كبار حبة حلاوة مطحونة ( مطحون في الدار)
2معالق كبار نافع مطحون( مطحون في الدار)
1 معلقة كبيرة خودنجال مطحون (مطحون في الدار راه واعر يتطحن انا كانسخنو في الفران وكانهرسو بالمطرقة على شي زيف وعاد نطحنو)
1معلقة صغيرة زعفران حر مطحون
14 ديال الزعفران الملون من الماركة الجيدة
نصف كاس ورقة سيدنا موسى مطحونة
نصف كاس سكر كلاصي
تاخذي كل هذه العطرية بعد ماتنقات وتطحنت وتغربلت تخلطيها مزيااااااان في شي اناء زجاجي وتشدي شي قرعة ديال الزاج (ماشي بلاستيك) وتكون نشفانة ونفية وتديري فيها هذ الخليط وتشدي 2 قراعي صغار وتديري فيهم غير لقياس ديال اسبووع وحدة للحوت تزيدي عليها كمية من الكامون وتكتبي خاص للحوت والمشوي وحدة ماتزيدي عليها والوووو كتبي عليها للحم الدجاج لحريرة الكسكسو الشعرية السباكيتي الروز بلحم ولا دجاج ولا حوت(انا كانديرها حتى في البسطيلة ولبيتزا ولكل حشوات )
*ملاحظة هااااامة جداا الكامووون ماكيجي غير للحوت وللمشوي وللقطبان وللبيض مع ماطيشة
