وأنا في الصراحة عيت.
ومني تزوجت وجيت لداري بتاكرت واحد الطريقة وااااعرة في العجينة وسااااااااهلة، وهي كالآتي
ملي كنفطرو كنجمع ماعن الفطور وكنجيب بانيو صغير، هاداك لي كنغسلو فيه الخضرة،
كندير فيه الطحين وندير فيه حفرة لوسط، في هاديك الحفرة كندير الملح والخميرة،
من بعد كنكب الما ونخلط بريوس صباعي حتى تدوب الخميرة والملحة،
ومن بعد نزيد الما دافي حتى تخلط العجينة وخاصها تكون مرخوفة شوية، غير تخلط وصافي، ما ندلك وما نتمحن،
ونجيب طبسيل ثقيل ديال البديع ونغطي بيه البانيو مزيان،
من بعد نحطو في مكان مطرف وندوز ندير شغالي ديال الدار عادي،
مني يوصل وقت العجينة العادي يعني 11أو 12، نعري البانيو ونفزك يديا بشوية ديال الما
وندير لهاديك العجينة لي تنفخاااات شي دريكة خفيفة،
غير نخرج منها الهوا وصافي،
من بعد نكورها ونحطها ترتاح قبل ما نكرصها، نغطيها ونخليها تخمر،،
ومني كطيب واااااو على خبز كيجي، بحال من الصباح ونتي كدلكي فيه.
أما بالنسبة للمسمن، كديري الطحين والملح وقريصة ديال الخميرة ولا بلاش كاع،
وتخطليه وتخلي العجينة قاسحة شوية،
ومني تخلطيه ديريه في بلاستيكة بيضة وحطيه في أي بلاصة وخليه ساعة ولا جوج ولا وقتما بغيتي وجبديه،
غادي تلقايه كيتبعك كي لاستيك، أما إلا بغيتي تحتافضي بالعجينة ديال المسمن والرغايف،
خليها في الميكة وديريها في الثلاجة.
وبالصحة والراحة
