التكتوكة هي شلاضة الفلفلة مشوية كلنا كنعرفوها وكل وحدة وطريقتها في اعدادها كاين لي كتشويها على الفاخر وكاين على البوطة وسمعت حتى لي كيفوروها
انا طريقتي بوحدها والنتيجة مضمونة والله حتى المذاق والبنة لا علاقة ..دابة البرد الشوميني ديما شاعلة والخشب طبيعي والنغمة ديالو احسن من الفاخر بزاف كنعزل واحد القنيتة فيها شي جميرات زاندين وكنستف الفليفلات ومن الأفضل يكونو ملونين وكنسد الباب ومرة مرة كنقلبهم بشي سفود ..فاش كيتشواو مزيان كنديرهم فبواطة بلاستيكية ونسد مزيان خص النفس ماتزهق..وهذا هو السر انني تنخلي ذيك البواطة فالثلاجة حتى الغد باش الفلفة تتشبع بريحة العود والشويان وتغلغل فيها الريحة حتى الأعماق.
الغد كنقشرها بلاما نغسلها غير كندوز صباعي تحت الما مرة مرة ..راه إيلا غسلناها كتمشي البنة مع الما ..صافي كنحيد الزريعة ونقطعها طراف كبار وننزل عليها بالموس او بفم الكاس هاك بالاك حتى تستغيث ههه حيت خصها تكون رقيييقة..كندير ليها شوية الملح والكامون والزيت والخل والإبزار ..كتجي غاية..لي ذاقها يطلب المزيد.
بالنسبة للباذنجان كنعزلهم صغار وكنشويهم بنفس الطريقة وكنشوي حتى الثومة وماطيشة وكنبيت كلشي مسدود عليه حتى الغد وكنمعكهم مع الشرمولة المعروفة ونسخن شوية قبل التقديم.
لي معندهاش الشوميني ماعليها غير تزند شي مجمر وتلوح فيه بعض الخشب اليابس وتقضي الغرض النتيجة هي هي .
