موقع وصفات لالة مولاتي يقدم بقلاوة سهلة وجميلة بالكاوكاو بالصور
مقادير بقلاوة سهلة وجميلة بالكاوكاو
مقادير وطريقة العجين
- 700 غ دقيق الحلويات
- ثلث كأس كبير زبدة ذايبة
- نصف كأس ماء الزهر
- 1 فاني
- ماء بارد لي يجمع العجينة
نجمعو العجينة وندلكوها مزياااااان تبقى شوية قاصحة
نغطيوها ونخليوها ترتاح ربع ساعة تقريبا عاد نقطعوها كويرات
ونخليوهم يرتاحو نصف ساعة أخرى
مقادير وطريقة الحشوة
- 500 غ كاوكاو أبيض ( الفول السوداني)
- كاس سكر كلاصي
- م ص قرفة
- ماء الزهر
نقليو الكاوكاو على نار مهيلة
ومرة مرة نحركو باش يتحمر على خاطرو ويجي مكرمل
نخليوه يبرد على خاطرو
ثم نطحنوه ونخليوه خشين شوية في حجم حبة الكسكس
ثم نضيفو عليه السكر كلاصي والقرفة
ثم ماء الزهر لي يفزك الحشوة لكن ماشي بزاف
خصها تبقى مفرتتة ما تتجمعش
طريقة تحضير بقلاوة سهلة وجميلة بالكاوكاو
نرشو مكان العمل بالنشا ونبداو نطلقو العجينةملي نكملو كل الكويرات نبدا نطلقوها فالماكينة
نبداو من الرقم 5 ثم 3 ثم 1 لي هو أكثر رقم رقيق
لكن كاين ماكينات لي فيهم الأرقام بالعكس
كل ورقة تكون مرشوشة مزيان بالنشا
وبعد ما نطلقوها نزلوها فوق الطابلة ونرشو النشا مرة اخرى
ونطويوها على 2 بحال كنفرشوها فوق بعضها
ونبقاو نزلو كل الوريقات كيف باين فالصور حتى نكملوهم كاملين
ناخدو المدلك ونرجعو نطلقو بيه العجينة
حسب قياس الصينية لي عندي
وردو البال خصنا نفرشو ونغطيو يعني قياس الصينية في 2
كنفرشو العجينة فصينية مدهونة مزياااان بالزبدة ذايبة
انا عملت سولفيريزي وعاد الزبدة ونفرشو الحشوة ونغطيوها بالعجين
نقطعوها حسب الأحجام لي بغينا وندهنو مزياااان بالزبدة ذايبة
ونقطعو وريدات من نفس العجينة ونثبتوهم فوسطها بحبة كاوكاو
ونرجعو نذهنو الوريدات وندخلوها لفرن
مسخن من قبل على 160 درجة ونراقبوها حتى تتحمر
كيف تخرج من الفران
نكونو موجدين العسل مخفف بماء الزهر وبارد
ونسقيوها مزيااان ونردوها للفران مطفي ونخليوها تبرد فيه
وهاهي بقلاوة سهلة وجميلة بالكاوكاو واجدة
